http://www.lne.es/cultura/2013/10/17/francesada-tresona/1485239.html

La francesada en Tresona

El 21 de mayu de 1809, l’exércitu napoleónicu entra n’Avilés - Díes enantes, nel territoriu de Gozón y Corvera, hai ñicios d’aición bélica escontra l’invasor

18.10.2013 | 01:58

Illustración de "La hestoria d´Avilés" sobre "La batalla de Valliniello", el 21 de mayu de 1809. | miguel solís santos

Miguel Solís Santos El 21 mayu de 1809, l’exércitu napoleónicu entra n’Avilés; pero díes enantes, nel territoriu de Gozón y Corvera hai ñicios de qu’hubiera aición bélica escontra l’invasor. D’ello dexen constancia los llibros parroquiales de difuntos, como’l de Tresona.

Poca sonadía tuvo n’Asturies el segundu centenariu de la Guerra la Independencia, igual qu’enantes tampoco la tuviera’l centenariu, en 1998, de la perda de Cuba. Entós, escribiéronse dalgunos llibros pervaloratibles sobre la época, pero nun se fexeron, al rodiu d’estos centenarios, los suficientes actos conmemorativos col envís d’afondar na conocencia y divulgación hestórica d’estes dómines clave de la nuestra Hestoria.

Y tornando a la Guerra de la Independencia, hai un episodiu que siempres me llamó l’atención pola so truculencia y el trauma qu’hubo ser pal pueblu asturianu. Trátase de la batalla de Valliniello -cerca d’Avilés. Sofitándonos nos relatos de los hestoriadores, sabemos que’l 2 de mayu de 1809, xusto’l día del primer aniversariu del escomencipiu de la Guerra en Madrid, el marqués de La Romana, xefe militar d’Asturies, disuelve la Xunta Suprema, que taba apautada na sala capitular de la catedral d’Uviéu, y impón pela fuerza la "Junta de Armamento, Observación y Defensa", de calter reaicionariu. Esta situación calez aínda más l’ambiente asturianu, onde la psicosis d’una inevitable invasión francesa esñala percima toles cabeces.

La invasión materialízase’l día 15 mayu: pel Occidente, dende Galicia, entra’l mariscal Ney. El día 19, pel Payares avanza’l mariscal Kellermann y pa nun dexar denguna operatividá a la milicia asturiana, dende Santander entra Bonnet. La escorribanda ye xeneral: el día enantes, les autoridaes del Principáu afuxen y dexen albintestate Uviéu. La primer invasión napoleónica d’Asturies ta práuticamente acabada. Namái que queda la ocupación de dalgunes villes costeres, como Avilés.

Por orde del xeneral Mathieu, la brigada de Marcognet tien que s’apoderar de la villa avilesina. Pa ello, ha avanzar dende l’este, entrando per tierres de los conceyos del cabu Peñes, algamar llueu’l camín real de Lluanco a Avilés -al altor de Valliniello- y trespasiar too darréu la ponte de San Sebastián, que crucia la ría, pa enfilar direutamente a la ciudá.

Esti "paséu" tan cenciellu va vese torgáu pola resistencia d’una mezclienda de civiles y milicianos, que convocaos nuna "alarma xeneral" de Gozón, Carreño, Corvera y Avilés, atrópense coles sos armes d’eficacia duldosa, pa facer frente a la columna francesa que vien pela parte de Tresona. El llugar escoyíu ye Valliniello, na viesca Los Carbayeos, monte dende’l que se domina’l camín real, la ría y la villa.

Al pasu de la columna invasora, los improvisaos guerreros llánciense escontra la vanguardia francesa, disparando los sos mosquetes y menazando coles sos espaes furruñoses. L’exércitu profesional francés nun tien nin pa empecipiar. Nun hai falta más qu’una carga. Nun avance ensin problemes, la caballería del capitán Clavet esfarrapa a los voluntariosos guerrilleros. Queda estráu’l suelu de calabres y feríos. Ensin más protocolu, los napoleónicos enfilen p’Avilés ensin atopar torga dala y ehí monten el so cuartel xeneral el tiempu que dura la invasión.

Dicíen les cróniques que la xornada’l 21 de mayu dexara unos 230 muertos del bandu asturianu y dengún, del francés. Nun conocemos los nomes de les víctimes de la francesada, pero calistrando pelos llibros parroquiales de difuntos de la redolada, apaecen informaciones valoratibles de l’abegosa xornada bélica.

En primer llugar, en Sabugo -el barriu marineru d’Avilés-, xusto’l 22 de mayu de 1809 -un día depués del desastre- hai un rexistru d’un difuntu qu’abondo paez tener que ver con esta batalla. Fáen-y funeral y entiérrenlu na ilesia parroquial. El difuntu llámase Tomás Álvarez de la Campa, de 48 años de edá, casáu con Juana Fernández y pá de cinco fíos. La causa la so muerte ta redactada de manera escura, como naguando por dexar constancia d’ella, pero ensin dar ñicios indiscretos, por si lo lleen güeyos enemigos. El rexistru diz que "no recibe los Santos Sacramentos por haber fallecido de muerte desgraciada". Ta ñidio que toles muertes son "desgraciaes", pero cásique nunca nestos llibros parroquiales s’espresa asina un fallecimientu. Por esti escatafín interpreto esta observación como escrita con llinguaxe crípticu, como dixe, pa evitar una posible represalia nes carnes de la familia’l rebelde.

Otru archivu que podría aventanos abondo lluz sobre la identidá de les víctimes de la batalla sedría’l de la ilesia de Valliniello, pero, por desgracia, comiéronla les llaparaes d’un incendiu na década los sesenta del sieglu XIX y de los llibros escritos enantes d’esta época nun queda nin la cernada.

De toes maneres, notra parroquia a la vera d’ésta, en Tresona, consérvase intautu l’archivu y ellí, el cura dexó constancia per escritu de los fechos que pasaren al rodiu d’esa fecha del 21 mayu:

Asina, el día enantes de la batalla, el 20, hai un rexistru que da una perbona información de la situación del exércitu francés. Esa víspora, escribe’l cura nel llibru de difuntos qu’entierren a Benito Gutiérrez. Y con él a "otros tres que mataron los franceses de la parroquia de Candás, Logrezana y Llaranes". Y ello foi en "el recinto de la parroquia de la qual me retiré después de ser robado y maltratado a culatazos".

Ta claro que los invasores ocuparen yá la redolada d’Avilés, enantes d’entrar trunfantes na villa y d’amarrase en combate. ¿Por qué maten a Benito y a los otros tres y por qué los entierren en Tresona? Perprobablemente por ser autores d’una aición guerrillera ensin fortuna qu’acaba en desastre. Podemos sospechar que fora un comandu de pocos miembros y que prepararen una trapa a una patrulla francesa en dalgún sitiu d’esta parroquia. Ye fácil camentar cuál foi’l desenllaz d’esta abegosa operación.

¿Y por qué-y peguen al párrocu? ¿Qué buscaben los franceses na reitoral? Ensin duldes, perres. Eso ye lo primero que desixíen en cuantes rendíen un pueblu. Por exemplu, n’Avilés, n’entrando, pidieron 49.000 reales al conceyu y reximientu de la villa.

Polo visto, al cura Tresona cutiéron-y a esgaya y al final afloxó la corexa los cuartos. El casu ye que, pa evitar más palos o males mayores, escapó a sabe Dios ónde per unos díes. En cuantes tornó a la so ilesia, atopó un paisaxe pa echase a llorar. Diznos lliteralmente que "estando fuera enterraron trece cadáveres". Ensin duldes, estos trece muertos son dellos voluntarios que llucharon en Valliniello díes enantes. Nun apaez escritu’l nome de dengún d’ellos, quiciabes pa caltenelos nel anonimatu y evitar represalies nes families, anque tamién pue ser que foren d’otres parroquies cercanes, polo que nun sabría cómo se llamaben.

Asina acaba un episodiu murniu de la primer invasión d’Asturies. Los franceses abandonen Asturies en xunu de 1810 y ocúpenla tres veces más, pa marchar dafechu’l 14 de xunu de 1812.

P’aselar, alcontré otru rexistru interesante, tamién nel llibru difuntos de Tresona: Once años más tarde, el 22 d’abril de 1821, un cura curiosu apunta qu’esi día "se manda dar sepultura a Juan Baptista, de nación francesa, que pareció haber muerto repentinamente en la casa o cabaña de Juan de Bango Redal, término de esta parroquia, por haberse encendido en la vevida (sic) de aguardiente".

Al final, nel primer cuartu del sieglu XIX, l’únicu francés muertu en Tresona ye en tiempos de paz y a manes del alcohol. ¡Coses de la vida!