Los conceyos tienen la obligación cívica de declarar la desimición d’oficiu

En rempuesta a la consulta fecha al Aconceyamientu de
Xuristes pol
Asturianu per delles asociaciones pa la defensa del nuesu
patrimoniu históricu,
sobro la llegalidá de les notificaciones que vienen
faciendo los conceyos de
Xixón y Piloña a propietarios d’horros centenarios,
axuntando certificaciones
individuales pal pagu del Impuestu sobro Bienes Inmuebles
(IBI, popularmente
conocíu como contribución), queremos dar a conocer al
conxuntu de la sociedá
asturiana l’informe darréu:

L’artículu 62.2.b) del Testu Refundíu de la Llei
Reguladora de les
Faciendes Llocales, afita que tan disimíos del IBI,
permediando solicitú al
respeutu, pente otros, los bienes abarcaos pela
disposición amestada segunda de
la Llei 16/1985,
de 25 de xunu, de Patrimoniu Hestóricu Español, na que
s’incluyen los horros y
cabazos más vieyos de cien años, qu’hai en Galicia y
Asturies, de los que
trata’l Decretu 449/1073, de 22 de febreru.

Nesi sen manifestóse espresamente la Subdireición Xeneral
de Tributos Llocales, pente medies de la Consulta
Vinculante
V0658-08, de 2 d’abril de 2008.

Poro, tolos titulares d’horros centenarios puen empobinar
a los conceyos
de Xixón y Piloña una solicitú de desimición del
impuestu.

Arriendes d’ello, al Aconceyamientu de Xuristes pol
Asturianu abúlta-y
necesario desixir a los conceyos de Xixón y Piloña que
declaren d’oficiu la
desimición del IBI pa los horros centenarios de los sos
conceyos porque,
penriba de pruyimientos recaudatarios, ta la obligación de
les alministraciones
municipales de cumplir bonalmente colos principios de
conservación y proteición
del patrimoiniu cultural asturianu, torgando actuaciones
que, como la presente,
puen ponelu en pelligru, propiciando la so destruición (si
l’horru se valta ya
nun paga impuestos).

N’Uviéu a 20 de febreru de 2008.

Pola Xunta Direutiva del Aconceyamientu de Xuristes pol
Asturianu roblen:
Xabiel Álvarez Villa, Silvino Cordero Pando y Xosé Lluis
del Río Fernández.