Aruelu.com / Ecoloxía
http://aruelu.com/spip.php?article1959
Denuncia de la Coordinadora Ecoloxista d’Asturies (CEA)
La CEA denuncia que’l Gobiernu consiente canteres irregulares
30/08/10
La Coordinadora Ecoloxista d’Asturies va presentar un recursu de reposición escontra l’autorización del Gobiernu nacional de permitir l’ampliación de la cantera de Llatores ubicada na llocalidá de Cellagú n’Uviéu, tremitáu el pasáu mes de xunetu.
"La esplotación de caliza ocupa una superficie total de 273.710 m2 y la cabera ampliación que se-y concediere fuere espublicada nel BOPA del 30-11-1995. Una vegada más el Gobiernu tolera los incumplimientos ambientales continuos de les canteres, y non solu permite esta situación sinon qu’autoriza l’ampliación ensin solventar estes irregularidaes, lo que supon un tratu de favor a les empreses qu’incumplen les normes de forma reiterada y continua".
Los incumplimientos mas destacaos sigún la CEA son:
Nun se procedió a realizar llabores de restauración y revexetación de les zones llaboraes, que tán completamente degradaes.
La escasa consideración que se-y otorga a los valores paisaxísticos del ária esplotable, al pesar de la elevada visibilidá que tien la esplotación nuna zona que se vería fuertemente afeutada.
El métodu actual d’esplotación nun favorez la reduición del impautu paisaxísticu, nin posibilita la restauración y apantallamientu de los bancos una vegada agotaos. Bona prueba d’ello ye la falta de recuperación paisaxística de les zones esplotaes na actual cantera onde nun se recuperó nada. Tóu ello al pesar de ser colindante cola trensitada Senda Verde a lu llargu d’unos 400 metros.
Cola fin de minimizar y atenuar los impautos paisaxísticos, deberán tenese rializaos apantallamientos arbórios en tóo’l perímetru de la esplotación, de manera qu’estos tean disponibles nel momentu en que s’entamen los llabores nos bancos superiores.
L’ampliación va afeutar a la Reserva Natural Parcial de La Cueva de Les Caldes, a 234 m, onde esisten colonies invernantes d’esperteyos de distintas especies. Destaca ente ellos l’esperteyu ratoneru medianu y el de cueva, dambos recoyíos nel catálogu nacional d’especies menazaes de la fauna vertebrada. Nel primer casu, como especie sensible a l’alteración del so hábitat (al igual que l’esperteyu ratoneru grande tamién presente nel llugar) y el segundu como especie d’interés especial.
Por nun esistir na actual esplotación, nun hai nin malla cinexética que protexa a los animales o persones d’entrar o cayer na esplotación, lo que supon un riesgu ciertu viendo los altures de la esplotación.
Nun se cumple denguna de les condiciones de proteición del sistema hidrolóxicu que yá se yos impunxere: nun tien canal perimetral alredior del ária d’esplotación nin cunetes perimetrales que recueyan les agües pluviales y d’escorrentía pa evitar la so introducción nel interior de la mesma.
Nun se traten les agües interiores de la esplotación, polo qu’incorpórense a los sistemes d’escorrentía natural de la zona y eso conlleva la filtración al sistema d’agües subterránies. Nun hai nengún sistema de depuración.
L’arroyu que pasa contigüu a la esplotación ye completamente colmatao, porque resulta evidente que nun se recueyen los llodos.
Nun se cumple denguna de les condiciones de proteición del mediu atmosféricu que tamién se yos impunxere: nun tán pavimentaes les zones de trénsitu de vehículos pa evitar les emisiones difuses de polvu. Non tolos puntos susceptibles de producir emisiones de contaminantes a l’atmósfera disponen de sistemes de proteición. El material alcuéntrase apiláu ensin proteición dalguna escontra l’aición del vientu en diferentes puntos de la esplotación. De los materiales almacenaos dalgunos tán apilaos fuera del llímite de la esplotación.
L’acesu a la cantera ta enllenu de llodos de los materiales almacenaos nuna situación de precariedá.
Nun hai llavador de ruedes pa evitar la dispersión del material na carretera.
Supérense de forma amplia los niveles d’emisión de ruíu derivaos del réxime de furrulamientu continuu de l’actividá que deben llimitase de manera tal que los niveles d’inmisión nel llímite de la zona minera axústese a les previsiones del Decretu 99/1985, del Principáu d’Asturies. Los llímites previstos nel citáu Decretu cumpliránse, tamién, nel esterior de les viviendes situaes nel entornu de la esplotación. Al pesar de la prosimidá a dos viviendes de la cantera, nun s’instaló denguna midía amortiguadora de los ruíos (mampares, plantación forestal, etc...).
En definitiva, la Coordinadora manifiesta que "nun se pue permitir que les empreses incumplan la normativa ambiental de forma continua, permitiéndoyos les autoridaes gubernamentales ampliar les instalaciones, xenerando asina, amás de problemes ambientales, una clara discriminación coles industries estractives que sí cumplen cola norma".