por Prenseru
Alto Narcea Muniellos, sede d’un proyeutu pa recuperar el patrimoniu arquitectónicu rural
Marzu 17, 2011 por Redacción
Asturies y Aragón trabayen nun proyeutu pilotu de recuperación del patrimoniu arquitectónicu rural que nel nuesu país va tener como sede l’Alto Narcea Muniellos. La Casa de Cultura Palaciu d’Omaña, en Cangas del Narcea, acoyó la presentación.
‘Soluciones constructives pa la rehabilitación del patrimoniu arquitectónicu rural’ ye’l nome d’esti proyeutu pilotu de la Rede Rural Estatal que busca sensibilizar sobre los valores del patrimoniu arquitectónicu tradicional del mediu rural y ofrecer soluciones téuniques pa la so conservación. Nél collaboren el Grupu de Desarrollu Rural Alto Narcea Muniellos, que xune Cangas del Narcea, Degaña y Ibias, y el Ceder Somontano, d’Aragón.
El proyeutu busca “promover bones práutiques de construcción y rehabilitación del patrimoniu arquitectónicu rural en procesu de deterioru por abandono o por práutiques constructives equivocaes y d’integración d’infraestructures rurales nel paisaxe atendiendo tamién a los aspectos ambientales” señalaron dende la Conseyería de Mediu Rural y Pesca. Pa ello, “van combinase téuniques d’arquitectura e inxeniería sostenibles y métodos tradicionales de construcción-rehabilitación”.
La Universidá d’Uviéu tamién va collaborar nesta iniciativa que va executase a lo llargo del 2011 y que va tener como resultáu la ellaboración de fichas téuniques que de forma cenciella y esplícita, mediante l’usu d’esquemes o proyeiciones informatizaes, muestren como reconstruyir, reparar o sustituyir los elementos o partes dañaes procurando adoptar medíes menos costoses y evitando la tentación de la demolición y el reemplazu. Tamién va haber actuaciones formatives y de tresferancia de conocimientos. El presupuestu d’esti proyeutu pilotu financiáu pol Ministeriu de Mediu Ambiente, Mediu Rural y Marín ye de 173.000 euros, de los que’l Gobiernu d’Asturies pon un 10 por cientu, 17.300 euros.
http://www.asturnews.com/index2008.php?idn=10890
15/03/2011
Cangas busca soluciones pa la rehabilitación del patrimoniu arquitectónicu rural
Redacción
El Grupu de Desenrrollu Rural Altu Narcea-Muniel.los presenta esti proyectu de cooperación que tien por principales oxetivos sensibilizar sobre los valores del patrimoniu arquitectónicu tradicional del mediu rural, promover bones práctiques de construcción y remocique, amás de dotar de soluciones técniques a los distintos axentes qu’intervinen nos procesos de rehabilitación del patrimoniu.
L’actu va tener llugar nel Auditoriu de la Casa Cultura "Palaciu d’Oumaña" esti miércoles 16 de marzu a les siete y media la tarde.