2/11/2006

La Nueva España

NUEVA QUINTANA

El centru de la tierra de los ástures

Ismael GONZÁLEZ ARIAS

Entro n’Arrabalde y aparco al pie de la ilesia. Dos paisanos dan la parpayuela a la sombra d’una de les cases. Nun se ve a naide más na rodalada. Estos pueblos de La Valdería zamorana sufrieron un despoblamientu tremendu. Subes dende Benavente o baxes dende La Bañeza y date la sensación que los pueblos lleven muncho tiempu dando los aboquíos.

Arrabalde, de toles formes, ye grande y asítiase nun llugar privilexáu: nuna balconada riba’l ríu Ería. Non una llomba. Nun ye ésta la correcta definición xeográfica del llugar nel qu’asitia. Una balconada: una especie de bancal natural dende’l que s’allarga, a un llau y al otru, la vega’l ríu.

Acércome a los paisanos y pregúnto-yos pola subida al Castru de Las Llabradas. Cola grandonería típica de los paisanos d’esta tierra, que ye la mesma que la nuestra d’esta parte de la cordelera Cantábrica, dizme ún de los dos:

– Llámome Pedro, la persona que más sabe del castru.

Asina son les coses. Ellí delantre mío tenía a Pedro. Dalguién pol que, según los mios apuntes, tenía que preguntar en pueblu. El mesmu qu’acompañara años atrás a los grandes equipos d’escavaciones arqueolóxiques y ficiera los principales descubrimientos del Castru de Las Llabradas.

La Valdería zamorana
La Valdeiría lleonesa ta integrada pelos conceyos de Castrocontrigo, Castrocalbón y San Esteban de Nogales. El conceyu más altu del ríu Eiría, el que s’alluga agües arriba, ye Trueitas, hestóricamente perteneciente a Cabreira Alta.

Agües abaxo del ríu, el diptongu "ei" del ríu Eiría y de la comarca lleonesa, La Valdeiría, piérdese. El ríu nómase en Zamora Ería y los conceyos que treviesa son los d’Alcubilla de Nogales, Arrabalde, Villaferrueña, Santa María de la Vega, Coomonte de la Vega y Morales del Rei. Nesti últimu términu, les agües del Ería améstense a les del Órbigu y pasen al pie de Benavente, onde s’axunten a les del Esla.

Tanto la tierra lleonesa como la zamorana integren una única comarca, que dixebro nesti casu pa centrame na importancia del llugar d’Arrabalde y, más en concreto, del Castru de Las Llabradas. Un llugar que, pa entender nel so conxuntu, tien de completase con un percorríu pela vecina comarca del Valle de Vidriales, onde s’afayen los restos del campamentu romanu de Petavonium.

Una tierra rica n’hestoria antigua. Pa ellonda meyor qu’entamar pola visita al Tesoru de Morales del Rei, nome que recibe un dolmen mal conserváu y una reproducción, al delláu, en total estáu d’abandonu. El llugar nun dexa de ser increíblemente patéticu: un dolmen arrodiáu de xalecinos de nueva planta, olvidáu de la mano de Dios, o de los antiguos dioses d’esta tierra que yá nun quieren o nun tienen nada que ver con ella. Un poco más arriba, nel valle, en tierres d’Arrabalde, otru conxuntu dolménicu, El Casetón de los Moros, presenta meyor estáu de conservación.

L’arquitectura del restu de La Valdería zamorana correspuénse cola zona de l’adoba y el tapial, propia igualmente de la comarca lleonesa y que, agües arriba, emprima a dexar pasu a la piedra. Dalguna construcción interesante, como la ermita de Santo Cristo de la Veracruz, a les afueres de Morales del Rei, de tan arreglada que s’alcuentra acaba dando la sensación d’un decoráu.
El comentáu abandonu de la población de los llugares alviértese nel deterioru de les cases. Como tamién nel fechu de que munches d’elles atópense recién restauraes y los modelos de referencia nun suelen ser enxamás los propios de la tierra. Pueblos como Santa María de la Vega, que fuera en tiempu importante, dexa ver al traviés del lladrillu vistu l’afán xeneralizáu por acabar con un pasáu lligáu a l’adoba y el tapial.

Arriendes de la citada ermita de la Veracruz, de llarga devoción na comarca, alviértese aína que les ilesies del entornu s’alcuentren iguaes. Son exemplu d’ello los de la propia d’Arrabalde y la d’Alcubilla de Nogales.

L’Acrópolis ástur
Frente a frente, los soldaos romanos de Petavonium y los guerreros ástures del Castru de Las Llabradas. El llugar sigue impresionando dos mil años depués. El Castru tuvo de ser, naquella dómina, la fortaleza más grande y mayor poblada de tola Asturies Cismontana. De xuru, bastante más qu’Astorga, que d’aquella nun debería ser más qu’un mínimu castru riba una llomba. Enforma más que l’afamada Lancia, averada al actual Lleón. Nin que dicir que descomanadamente superior en grandeza y población a lo que podríen ser los llugares poblaos de la nuestra costa.

La vista dende arriba ye tan formidable qu’abarca tola tierra de los ástures. Al norte, bien llueñe, a cerca de cien kilómetros, la muralla montañosa cantábrica, na que se dibuxa como malapenes un puntu la Pena Ubina. Al sureste, ríu Ería abaxo, Benavente y la llinia verde del Esla.

Impresionante ye dicir poco. Por más que conoza l’emplazamientu de la citada Acrópolis. O que me sorprendiera l’asentamientu maya de Tulum, a la vera de la mar de la Costa Maya. O que me pareciera increíble’l palaciu de Knosos, en Creta, o les llargues fileres de piedra de Carnac. Dafechamente diferente a toos ellos, metanes de nenyure, el Castru de Las Llabradas date la sensación de tar nel centru de la tierra. Dafecho talo. Nel centru de la tierra de los ástures cismontanos. El llugar dende’l que plantaron cara a les llexones romanes depués de franqueada la llinia sagrada del Esla.

Los restos actuales del castru son escasos y correspuéndense colos d’un pobláu de los ástures probablemente habitáu dende’l sieglu I enantes de la nuestra era. L’abandonu nel que s’afaya tien relación colfechu de que, depués de conquistáu, posiblemente fuera arrasáu poles tropes romanes y quedara vedao volver habitalu.

Dientro de lo que tuvo de ser el recintu amuralláu, el tamañu ye tan descomanáu que tuvo de dar cabida a una gran población y a tola cabaña ganadera necesaria pal so mantenimientu, amás de terrenu de pastos y una amplia zona pal almacenamientu del agua. Nesti sentíu, comentábame’l citáu Pedro, que’l castru estiéndese a lo llargo de 24 hectárees.
L’amurallamientu a lo llargo de la mayor parte del castru ye doble y, reconstruyíes parcialmente, puen vese dos de les sos puertes. Pa potenciar el carácter defensivu del llugar aprovechóse la propia roca de dos peñes ente les que s’asitia’l castru, el Cantu y la Cedera.

Nel tiempu del asediu y, nel propiu de la vida nel castru, l’agua convertíase nuna primera necesidá. D’ehí que s’entienda la importancia y el tamañu del Pozu de la Negruría, na fondonada de Valdemoratones, dientro del mesmu recintu, un depósitu artificial que pañaba l’agua de les lluvies de les llombes cercanes.

Una visita obligada, en xunto: la comarca y el castru.

Recordando que, ente la subida a la peña y el percorríu pel castru, la visita habrá llevar cerca de tres hores. Tiempu mínimu pa poder disfrutar de la estraña sensación d’afayate nel centru de la tierra de Zamora.